HISTORIA LIBRI IV REGUM

CAPUT III: De sale Elisaei

#IV Reg. II

Tunc dixerunt viri Jericho ad Elisaeum. Terra haec optima est, sed aqua fontis pessima terram facit sterilem. Qui assumens vas novum terreum misit in illud sal, et egressus ad fontem misit sal in illum. Et cum orasset ait: Haec dicit Dominus: Sanavi aquas has, et non erit in eis mors ultra, neque sterilitas. Forte morbosa erat bibentibus cum sterilitate. Et sanatae sunt aquae, usque ad diem hanc. Cumque ascenderet in Bethel, illudebant ei quadraginta duo pueri dicentes: Ascende calve. Et maledixit eis in nomine Domini, id est per nomen Domini, vel invocato nomine Domini. Egressique sunt duo ursi de saltu, et devoraverunt eos. Cumque transisset per montem Carmeli, rediit in Samariam, et habitabat in ea.